అద్భుత ఆవిష్కరణ.. ఇక గోడలకు మేకులు, డ్రిల్లింగ్‌తో పనిలేదు!

ఇంటి గోడలకు మేకులు కొట్టడం, డ్రిల్లింగ్ చేయడం సర్వసాధారణం. అయితే దీనివల్ల గోడల అందం దెబ్బతింటుందని, మరమ్మతులు చేయాల్సి వస్తుందని చాలామంది భావిస్తుంటారు. ఈ సమస్యకు పరిష్కారంగా అర్జెంటీనాకు చెందిన ఓ యువ ఆవిష్కర్త సరికొత్త టెక్నాలజీని అభివృద్ధి చేశాడు. 'ఐరన్‌ప్లాక్' పేరుతో అతడు రూపొందించిన ప్రత్యేక మిశ్రమంతో, ఇకపై గోడలకు మేకులు, స్క్రూలు లేకుండానే వస్తువులను సులభంగా తగిలించుకోవచ్చు.

అర్జెంటీనాకు చెందిన 29 ఏళ్ల మార్కో అగస్టిన్ సెక్కీ ఈ వినూత్న ఆవిష్కరణ చేశాడు. ఐరన్‌ప్లాక్ అనేది ఒక ప్రత్యేకమైన సిమెంట్ లేదా ప్లాస్టర్ మిశ్రమం. ఇందులో కొన్ని ఖనిజాలు, ఇనుము సంబంధిత పదార్థాలను కలుపుతారు. ఈ మిశ్రమంతో గోడకు పూత వేసినప్పుడు, ఆ గోడ ఒక మాగ్నెటిక్ ఉపరితలంలా పనిచేస్తుంది. దీనికి విద్యుత్ అవసరం లేదు. ఫ్రిజ్ డోర్‌కు అయస్కాంతాలు ఎలా అంటుకుంటాయో, అదే విధంగా ఈ గోడలకు కూడా అయస్కాంతాలు ఉన్న వస్తువులు అతుక్కుంటాయి.

ఈ టెక్నాలజీతో ఫొటో ఫ్రేమ్‌లు, అద్దాలు, పనిముట్లు, చిన్న షెల్ఫ్‌ల వంటి వాటిని గోడలకు ఎలాంటి నష్టం కలగకుండా అమర్చుకోవచ్చు. వాటి స్థానాన్ని మార్చాలనుకుంటే సులభంగా తీసి మరోచోట పెట్టుకోవచ్చు. ముఖ్యంగా అద్దె ఇళ్లలో ఉండేవారికి ఇది ఎంతగానో ఉపయోగపడుతుంది. ప్రస్తుతం ఈ టెక్నాలజీ పైలట్ టెస్టింగ్ దశలో ఉంది. అంతర్జాతీయ పేటెంట్ కోసం దరఖాస్తు చేశారు. 

ఇది ఎంత బరువును మోయగలదు, ఎంతకాలం మన్నుతుంది అనే అంశాలపై పూర్తిస్థాయి పరీక్షలు జరగాల్సి ఉంది. ఈ ఆవిష్కరణ విజయవంతమైతే నిర్మాణ, ఇంటీరియర్ డిజైనింగ్ రంగాలలో ఇది విప్లవాత్మక మార్పులు తీసుకువచ్చే అవకాశం ఉంది.